చదువు-ఆనందం-అభివృద్ది

 READ -ENJOY-DEVELOP

చదువు-ఆనందం-అభివృద్ది

         100% శీర్షికకు తగిన కథ

〰️〰️〰️〰️〰️〰️〰️〰️〰️〰️〰️

   

"ఏంటి రా వరుణ్, బడికి వెళ్లకుండా ఆవులు కాయటానికి వచ్చావ్"

అని అడిగింది ఆవులలో 

వెనకనున్న ఆవు.

"నాకు ఇక చదువు రాదని 

మానాన్న మరియు మా నరేంద్ర సార్

నిన్న ఓ నిర్ణయనికి వచ్చారు" 

బాధగా చెప్పాడు వరుణ్.

"చదువేముందిరా, నేను గడ్డి తిన్నంత సులువు"

అంది ఆవు.

 "అలనా ?... అలా ఎలా?" 

ఆశగా అడిగాడు వరుణ్. 

అప్పటికే పొలం వచ్చింది. 

"ముందు నన్ను కాస్త తిననివ్వు తరువాత చదువు మర్మం చెపుతా "అని మేత లో మునిగి పోయింది ఆవు. 

కాసేపు ఓపిక పట్టిన వరుణ్

"ఎం చేస్తున్నావ్? 

నాకు ఎదో చెపుతానని 

నీవు తింటూ ఉన్నావ్" 

అని అడిగాడు. 

నేను ఏకాగ్రతగా 

ఆంత్ర గ్రహణం చేస్తున్నా....  

కదిలించకు అంది ఆవు. 

అదేమిటి కొత్త గా ఉంది అని వరుణ్ అనగా "ఆహారాన్ని లోపలకు తీసుకోవడాన్ని *ఆంత్ర గ్రహణం*  అంటారు.

అంటే *తరగతిలో ఉపాధ్యాయుడు పాఠం చెప్పేటప్పుడు వినటం లాంటిది.* ఇక్కడ శ్రద్ధ అవసరం. 

అర్ధమైన కాకున్నా ముందు వినాలి.

ఇది చదువు యొక్క మొదటి లక్షణం.

ముందు నన్ను సరిపడినంత తిననివ్వు. 

మిగిలినది తరువాత చెపుతా" అంటూ తినటం కొనసాగించింది

వరుణ్ వైపు చూస్తూ.....

తినటం లో ఉన్న శ్రద్ధ వినటం లో ఉండాలన్నమాట

" అనుకున్నాడు.

కాసేపు గడిచాక  ఆవు , 

వరుణ్ ఇద్దరూ చెట్టు కిందకు చేరారు.

 "అదేంటి ఒట్టిగా నోరు చప్పరిస్తూ నములుతున్నావ్" 

వింత గా అడిగాడు వరుణ్. 

దానికి ఆవు నవ్వుతూ ..... 

దీనిని నెమరు వేయటం

అంటారు. 

ఇందాక  గబ గబ తిన్న ఆహారాన్ని తీరుబడిగా నోటిలోకి తెచ్చుకొని నమలటం. 

ఇది చాలా ముఖ్యం.

"ఎందుకలా" అడిగాడు వరుణ్. 

ఉపాధ్యాయుడు చెపుతున్న చాలా విషయాలు అప్పటికి బాగుంటాయి.

కానీ కాసేపటికి మర్చిపోతాం.

అందుకే ఇంటికి వచ్చాక తీరుబడి గా నెమరు వేసుకోవాలి.

ఎవరికైతే నేమరు వేసే అలవాటు ఉంటుందో వారికి చదువు బాగా జీర్ణమౌతుంది.

నిజానికి చదువు లోని మర్మం ఇదే.

అని రహస్యంగా చెప్పింది ఆవు.

 వరుణ్ కి తన పొరపాటు ఇప్పుడు అర్ధమైంది. 

తాను ఏనాడు ఇంటికొచ్చి 

పుస్తకం ముట్టింది లేదు.

సాయంత్రమయ్యింది. 

ఆవులు ఇంటికి మల్లాయి. 

వరుణ్ చూపు అంతా ఆవు మీదనే ఉంది. 

అది ఉదయం కన్నా హుషారుగా ఆనందగా ఉంది. 

ఏంటి విషయమని వరుణ్ అడిగాడు.

దీనిని స్వాంగీకరణ అంటారు. జీర్ణమైన ఆహారం రక్తంలో చేరి మనకు శక్తిని హుషారును ఇస్తుంది. జీర్ణం సరిగా జరిగితేనే ఈ ఆనందం అనుభవించగలం.

అంటే చదువు నీకు అర్థమై ఒంటపట్టటం. 

అది తెలిస్తే చదువు రుచికరంగా ఉంటుంది. 

నీకు ఒక పేరును గుర్తింపును తెస్తుంది. 

నీ ముఖం లో ఓ వెలుగు, 

నీ పేరుకు ఓ మెరుపు వస్తాయి అంది ఆవు. 

వరుణ్ గుండె పట్టుదలతో కొట్టుకోగా రక్తం వేగంగా పంతంగా పరిగెత్తింది.

అంతేనా ఇంకేమైనా ఉందా? ఆలోచనగా అడిగాడు వరుణ్.

ఇంకో విషయం ఉంది. 

పేడ తట్ట తీసుకొని రా చెపుతా అంది అవు. 

వరుణ్ కి విషయం అర్థమై తట్ట తెచ్చి పేడ పట్టి పక్కన పెట్టి చెప్పు అన్నాడు. 

చదువులో చివరి విషయం 

మల విసర్జన.  

అంటే పనికి మాలిన పనులు వదిలేయడం.  

కబుర్లు.... చరవాణి(సెల్ ఫోన్) ముచ్చట్లు ....దూరదర్శిని(టి.వి) ధారావాహికలు వంటి

వాటిని విసర్జించాలి.

అప్పుడు నీకు జీర్ణం చేసుకోవటానికి మరింత   సమయం దొరుకుద్ది. 

అని నవ్వుతూ చెప్పి ముగించింది ఆవు.

 ఆవుకు మేత పెట్టి వరుణ్ ఇంటికెళ్లాడు.

నెల గడిచింది. 

వరుణ్ కి సంగ్రహణాత్మక పరీక్ష-2 (SA-2) ప్రోగ్రెస్ కార్డు ఇస్తూ .... 

నరేంద్ర సార్ ఆశ్చర్యంగా మొదటి సారి మెచ్చుకోలుగా 

చూసాడు.

ఈ సారి వరుణ్ ఇంటికి వెళ్లకుండా నేరుగా ఆవుల వద్దకు బయలు దేరాడు. 

"ఆ " రోజు సాయంత్రం ఆవు నడిచిన నడకలోని శక్తి  వరుణ్ 👣అడుగులలో ఈ రోజు  కనిపిస్తుంది.....

చదువు అనేది ఆనందంగా ఉంటూ మరియు కాబోయే భావి భారత పౌరుడిలా...అభివృద్ది చెందడానికన్నట్లు ...సాగింది వరుణ్ నడక.

ఉదయం బడికి వచ్చే విద్యార్థి ఎంత ఆనందంగా వస్తాడో సాయంత్రం ఇంటికి వెళ్లేటప్పుడు కూడా అంతే ఆనందంగా పంపినపుడే ఉపాధ్యాయులు ఆ పాఠశాల విజయం సాధించినట్లు.

〰️〰️〰️〰️〰️〰️〰️〰️〰️〰️〰️

పసుపులేటి నరేంద్రస్వామి

9848696955

ఉపాధ్యాయులు,జి.ప.ఉ.పా మాసాయిపేట,యాదగిరిగుట్ట మండలం, యాదాద్రి జిల్లా